A topic that needed to b addressed & glad you touched it!

More reflection, please

http://www.ethiotelecom.et/contactus/general.php

The last time when i was in South (more than a year ago), there was at least 60% of mobile coverage at that area. i don’t know the current status. Turmi might be a big difficult to access. If you bring unlocked SIM card, it is possible to use Ethiopian SIM card. Only around Addis Ababa has 3G coverage.

You can buy a SIM card from tele centers. It is better to arrange this when you are in Addis before traveling to the south. All you need is a copy of your passport and 2 pictures.

hope it helps

እንደምናታስታውሰው በክረምቱ መጨረሻ በተጠናቀቀው የሎንዶን ኦሎምፒክ ሀገራችንን ወክለው የሄዱት የኮሚቴ አባላት ፈፀሙት የተባለውን የእምነት የማጉደል ተግባር አስመልክቶ ቅሬታዎችና ተቃውሞዎች በስፋት ሲደመጡ ነበር ። መቼም (ግርግር ለሌባ ያመቻል እንዲል የሀገራችን ሰው !) ድንገተኛው የጠቅላይ ሚኒስትር መለስ ዜናዊ ሞትና የሚዲያ ትኩረት አቅጣጫ መለወጥ የኦሎምፒክ ኮሚቴ አባላት እየተሰማባቸው ከነበረው ጠንካራ ተቃዎሞ ፋታ ስለሰጣቸው “እሰይ ግልግል” እንደሚያሰኛቸው አይጠረጠርም ።
…
ይህ ሲገርመን ይባስ ብሎ መንግስት ተጠያቂ ሊያደርጋቸው የሚገባቸውን እነዚህ ሰዎች ከአትሌቶቻችን ጋር ቀላቅሎ ሸለማቸው መባልን ስንሰማ ትልቅ ሀዘን ፈጥሮብናል ። እዚህች ኢትዮጵያ የምትባል ሀገር ላይ ሀሰተኞችና ሙሰኞች በአግባቡ የሚዳኙት መቼ ይሆን ? በመሆኑም ይፋ መሆን ጀምሮ የነበረውን በሀገር ስም የተፈፀመ የህገ ወጥነት ተግባር የአቶ መለስ ሞት እስከወዲያኛው አዳፍኖ ሊያስቀረው ስለማይገባ እርሳቸውን የተኩት ጠቅላይ ሚኒስትር ሀይለማርያም ደሳለኝና ጓደኞቻቸው ተገቢውን እርምጃ እንደሚወስዱ በመተማመን በጀምአችን በኩል የነሱትን አቤቱታዎች እንቀጥላለን ።
በፌስ ቡክ በተከታታይ የደረሱን ጥሪዎች እኛ ጓደኛሞቹን (የዚህ አስተያየት ፀሀፊዎች ) ብቻ ሳይሆን መልዕክቱን የተመለከቱ ኢትዮጵያውያንን በሰፊው ያነጋገረ ይመስለናል ፡፡ አንደኛው መልዕክት “ኢትዮጵያ በኦሎምፒክ ያገኘቻቸው ሜዳሊያዎች የጀግኖች አትሌቶቻችን የግል ጥረት ውጤት ብቻ ናቸው ! ፣ ጋዜጠኞች በአትሌቲክስ ፌደሬሽንና በኦሎምፒክ ኮሚቴ ውስጥ ያሉ ከሀዲዎችን ማጋለጥ አለባቸው ! ፣ እናንተ ስግብግቦች ! 2 ብራችንን የት አደረሳችሁት ? “ እያለ የውግዘት ናዳውን ያዘንበዋል ፡፡
[Call against the DISTRUSTED Olympic team leaders - Ethiopia’s Olympic medals are the achievements of only our heroine and hero athletes. Media professionals have the responsibility to expose the betrayers in the athletics federation and Olympic committee. You pigs! Where did you put our 2 birr?]
እዚህ እኛ ሀገር ይኼ መከረኛ ኦሎምፒክ አራት ዓመት ጠብቆ በመጣ ቁጥር አትሌቶቻችን የቀናቸው እንደሆን በድላቸው የምንምነሸነሽበት ብቻ ሳይሆን እነርሱን እንዲያግዙ ሀላፊነት በጣልንባቸው የኮሚቴ አባላት መሀከልም በሚፈጠረው “የሰርቀሀል – አልሰረቅኩም ፣ የታምኛለው- አልታመንሽም ! “ ሙግት የምንተራመስበት እንዲሆን የተፈረደብን ይመስላል ፡፡
ካስታወሳችሁ የዛሬ አራት አመት በቻይና ኦሎምፒክ ጊዜ እኛ ቀይዋ የኮሚቴ መሪ አንድ እሁድ ላይ በኢቲቪ የቀጥታ ስርጭት ቀርበው “ ሀላፊነትሽን ሽፋን በማድረግ ለራስሽም ለቤተሰብሽም እንዲህ እንዲህ ያለውን ነገር ፈፀምሽ “ እየተባሉ ሲወቀሱ ፣ እርሳቸውም “ ሀሰት ! “ እያሉ ሲመልሱ እኛ ደግሞ ለመፍረድ እስክንቸገር ደረስን ። በመጨረሻም ነገሩ እውነት ይሁን ሀሰት ሳይጠራ በማን ትህዛዝ እንደሆን ሳይታወቅ ፕሮግራሙ ተቋረጠ ።
በወቅቱ ኢቲቪ ላይ ሙግቱን የከፈቱት ጋዜጠኞች አሁን ከጣቢያው ጠፍተው የት እንደደረሱ ባናውቅም አጀንዳቸው ተጨማሪ አጀንዳዎች ወልዶ ዛሬም ድረስ አለ ። ተከሳሽ የነበሩት የኮሚቴው ሰብሳቢም ወይዘሪት ዳግማዊት ከመንበራቸው ንቅንቅ ሳይሉ ዓመታት ቆጥሮ ከሚመጣው ክስ ጋር ተገጣጠመዋል ። [እግረ መንገድ … እንዲያው ግን እዚህ ሀገር የስልጣን ዕድሜው ልክ እንደበረሀ መንገድ የትና መቼ እንደሚያቆም የማይተወቅለት ሰው ምነው በዛሳ ?] ፡፡ የዘንድሮውስ የባሰበት ነው ። ምናልባት የያኔውን ክስ “ እህህ …” ብሎ ጆሮ የሚሰጠው “ አውራ መሪ” በማጣቱ ይሆን ታሪክ ታሪክን መድገም ሳይሆን ታሪኮችን የወለደው ?
ከአራት ዓመት በፊት “ በኦሎምፒክ ስም ቤተሰብ ተኮር ጥቅም ማገኘት “ በሚል ቀርቦ የነበረው ቅሬታ ዘንድሮ ደግሞ “ በኦሎምፒክ ከለላ ወዳጅ ፣ ጓደኛን ሳይቀር መጥቀም “ ወደሚል አድጓል ። በየአራት ዓመቱ የሚሰማባቸውን የህዝብ እሪታ ለማጣጣል የማይደክሙት የኮሚቴው ሰብሳቢ ወይዘሪት ዳግማዊት ግርማይ እንደተለመደው ጓደኞቻቸውን አስከትለው ከቴሌቭዥኑ መስኮት ወይም ካመቻቸው መድረክ ብቅ እስኪሉ ድረስ እኛ ግን ጠይቀን የሰማነውን ፣ ሳንጠይቅም ጆሮና አይናችንን ፈልጎ ከያለንበት የመጣውን እውነት መሰረት አድርገን እንዲህ እንላለን ።

መቼም “ ኢትዮጵያ በዓለም ላይ ብዙ የኦሎምፒክ ኮሚቴ አባልና ጥቂት አትሌት ይዛ ወደ ሎንዶን የሄደች ሀገር “ መባሏን ወይዘሪት ዳግማዊት ፣ እነአቶ አማኑኤል አብርሀምና ወዳጆቻቸው ሎንዶን ላይ ተሰባስበው ፈታ ዘና እያሉ በነበረበት ወቅት እንደሰሙ እርግጠኞች ነን ። ለኮሚቴው ከሁለት ብር እስከ ሚሊዮን ያለስስት የሰጠውና እነርሱ ያልታመኑለት የጉዳዩ ባለቤት የሆነው ዜጋ ከሀይገር ባስ እስከ እርሻ ቦታው በያለበት ሆኖ በትዝብት ሲያላምጠው የከረመ ጉዳይ ነውና ።
እነዚህ ሰዎች ከማንም በላይ አስፈላጊ የሆኑንን አትሌቶቻችንን ሳይሆን ለኦሎምፒክ ውጤታችን ምንም እርባና የሌላችውን ሰዎች አግተልትለው መሄዳችው ገርሞን ሳይወጣልን ፣ ጭራሽ ይለይላችሁ ብሎ ነው መሰል በአደባባይ ከነገሩንም ቁጥር በላይ በምስጢር ወዳጆቻቸውን (ጓደኞቻቸውን) ሳይቀር በደግነት በሰጠናችው ገንዘብ እንደጠቀሙበትና ውለታ እንደዋሉበት ደረስንበት ።
እንደሰማነው የአትሌቲክስ ፌደሬሽን ገንዘብ ያዥ አቶ አማኑኤል አብርሀም እንኳ ስንት ዘመን የኖረውና የዕድሜ ማብቂያው መቼ እንደሆን የማይታወቀው ስልጣናቸው (እረ ለአላህ ብለው አሁንስ ይብቃዎት ?) ከኦሎምፒክ ጋር ምንም ግንኙነት ሳይኖረው እንዲሄዱ ተደርገዋል ። እርሳቸው በገቡበት በርም ስፖርቱን የማያውቁት ሳይቀሩ ቡድናችንን ሳይሆን በጉዞ የሚገኘውን ገንዘብና ጥቅማጥቅሞች ፣ ሲመለሱም ከአትሌቶቻችን ጀርባ መሽገው ከመንግስትና ህዝብ እጅ ለመቅለብ የሚጠብቁትን ሽልማት በመውደድ ባለመብት ሆነዋል ። እንደጠበቁትም መንግስት ሸለማቸው ።
እንዲህ አይነቱ በኦሎምፒክና አትሌቲክስ መስሪያቤቶች ሹማምንት እየተፈፀመ ያለው ድፍረት የበዛበት የአደራ በሊታነት ተግባር በስፖርት ተቋሞቻችን ውስጥ የተንሰራፋውን የሞራል ኪሳራ (moral bankruptcy) ይጠቁማል ። ከዚህም ባለፈ ከየትኛውም ስፖርት በበለጠ በአትሌቲክ ስፖርተኞቻችን እያስመዘገብን ያለው ስኬት የተቋማቱ ሳይሆን የአትሌቶቹ የግል ጥረት ውጤት ነው ሲሉ ብዙዎች የሚናገሩትን አምኖ ለመቀበል ይገፋፋል ።
በወንዶች አስር ሺ ውጤታችን ተኮማትረን እያለን (የታሪኩ በቀለን ትግልና ውጤት እያከበርን) አዲሷ ጀግናችን ቲቂ ገላና በማራቶን ወድቃ በመነሳት ክሳናለች ። ሁሉም ውድድሩን የተከታተለ ወገን ልብ እንዳለው ግን ጢቂ ይህን ድል ለማምጣት በውሀ ጥም እየተንገላታች ጥሪዋን እንኳ የሚሰማ አጥታ በፅናት ሮጣ አሸንፋለች ። ኬንያውያን በየርቀቱ ተገኝተው ለአትሌቶቻቸው ይሰጡ የነበረውን ድጋፍና አቅርቦት ተመልክተን ስናደንቅ ስለራሳችን አዝነናል ። ቲቂም በውሀ ቅብብሎሽ የገጠማትን አወዳደቅና ጉዳቷን አይተናል ።
ከዚሁ ጋር እንደሰማነው ከአትሌቶቻችን ጋር የሄዱት የኮሚቴ ገንዘብ ያዥ (አቶ ገበያው ከበደ ) በሎንዶን ከተማ ለአትሌቶቻችን ተዘጋጅተው በነበሩ ፕሬስ ኮንፈረንሶች ላይ መገኘትና ስለ አትሌቶቻችን መረጃ መስጠት ግዴታቸው ሆኖ ሳለ በአንዱም ላይ ሳይከሰቱ የቀሩት ሎንዶን ባሉ ድረ ገጾች እንዳነበብነው ለሬስቶራንትና ለሸቀጥ ሸመታ እንጂ ለወሰዱት ሀላፊነት ጊዜ አጥተው ይሆን ? ወይስ ድሮም የእርሳቸው ባለሆነው ሙያ ተሸማቅቀው ? (ፕሬስ አታሼነትና ገንዘብ ያዥነት ምን አገናኛቸው ?)
የስፖርት ጋዜጠኛ ፍስሀ ተገኝ ከሎንዶን እንግሊዝ ፣ ሸገር 102.1 ሬዲዮ እና ሌሎችም በሁኔታው በማዘን ሲዘግቡት እንደነበረው የኦሎምፒክ ተካፋይ ሀገራት እንዳደረጉት ሁሉ የኦሎምፒክ ኮሚቴ ሰውየ የለንደን አድራሻቸውን በግልፅ ማስቀመጥ ሲገባቸው የመስሪያ ቤታቸውን የአዲስ አበባ ስልክ ትተው መሰወራቸው ዓለም በተሰበሰበበት መድረክ በሰሯት ቀሽም ሽወዳ (trick) ብቻ ሳይሆን በእኛም በኢትዮጵያውያን ላይ በፈፀሙት የማላገጥ ድፍረት ተገርመናል ።
ጓደኞቻቸውም ቢሆኑ የቀጥታ የቴሌቭዥን ስርጭት የሚኖርባቸውን የፍፃሜ ውድድሮች እየጠበቁ ሀገር ወዳድ ለመምሰል ባንዲራ እየያዙ በካሜራ ፊት ዳንኪራዊ ድራማ ከመስራት በስተቀር በውድድሮች እየተገኙ አትሌቶቻችንን ለማበረታታት እንኳ አለመፈለጋቸው አሳዝኖናል ። (ዋናተኛዋ ያኔት ስዩም አሁንስ በረታሽ ይሆን ?)
በነገሩ ልቡ የተነካው የፌስ ቡክ ቧልተኛ “ኢትዮጵያውያኑ የኦሎምፒክ ድንኳን ሰባሪዎች የት ገብተው ነው ? ” ሲል ላነሳው የእኛም ጭምር ጥያቄ የኮሚቴው አባላት ማብራሪያ ብቻ ሳይሆን ስለሆነውም ሁሉ የይቅርታ ቃል ቢተነፍሱ ቢያንስ ከሞራል ኪሳራቸው ለመውጣት ላሳዩት ፍላጎት ዋጋ እንሰጣለን ።
በኦሎምፒክ ቦታ ከአትሌቶቻችን ጋር ያልታዩት የኮሚቴው አባላት ውድ ቁሳቁሶችን በብዛት በህገወጥ መንገድ ያለ ቀረጥ ማስገባታቸውንም ሰምተናል ። የኢትዮጵያ ገቢዎችና ጉምሩክ መስሪያ ቤት ባለስልጣናት ግን ለነዚህ ግለሰቦች የነፃ ፍቃድ በመስጠት መሰል ሀላፊነት የማይሰማቸው ሰዎች ነገም ተመሳሳይ ታሪክ እንዲደግሙ በማበረታታቸው የተሰማንን ቅሬታ እንገልፃለን ።
[ የኢቲቪ እና የሸገር ሬዲዮ የስፖርት ጋዜጠኞች በስሱ ጀምራችሁት የነበረውን “ምርመራ” ወደ ኋላ ላይ “ይለፈን” ብላችሁ የተዋችሁት በየትኛው እንቅፋት ተጠልፋችሁ እንደሆነ እንገምታለን ። እንደ ኢትዮጵያ ባለች ድሀ ሀገር እናንተ ያገኛችሁት የውጭ ጉዞ ስፖንሰርሽፕ እና ጉርሻዎቹ እንደ ሰው የማሰብ ነፃነትን ጭምር ሊገዳደር እንደሚችል እንረዳለን ። ]
ወደ ኦሎምፒክ ለመሄድ የተፈጠረውን ግርግርና ትርምስ ከሰማን በኋላ ስለ ሀገራችን ኦሎምፒክና አትሌቲክስ ድርጅቶች ለማወቅ ያደረብን ዝንባሌ ማመን የሚከብዱ ሀቆችን እንድንታዘብ አድርጎናል ። ድርጅቶቹ ተነክረው በኖሩበት ያለመጠየቅ ባህር ውስጥ ጥርሳቸውን ነቅለው አድገው ፣ በዚህ ሰብህናቸውም ተፈርተውና ተከብረው ለጉልምስና የበቁ ማንም ሀይ የማይላቸው የቤት ልጆች አሏቸው ፡፡ ከበታች ሠራተኛ ጀምሮ ሹመኛ ወይም ተመራጭ ነኝ እስከሚለው ድረስ ግልፅና ስውር ሰንሰለት ያላቸው በመሆኑም እነርሱን መንካት ፣ ለምን እንዲህ ይኮናል ብሎ መጠየቅም ሆነ መሟገት ከማበጀት መባጀት ይበዛዋል ።
ሰንሰለቱ ከአንዱ ተቋም ወደ ሌላው ሳይቀር በፖለቲካ ፣ በዘር ፣ በጥቅም ወገንተኝነት ወዘተ ተቀጣጥሎ ሲያያዝ ያጋጥማል ። በዚህም ምክንያት አይደለም የበላዮች ከታች ያሉት ተራ ሠራተኞች እንኳ ለሚፈፅሙት ግልጥልጥ ያለው ሀጢያታቸው ሰሚ ማግኘት የህልም ያህል ነው ይባላል ። የማስተዳደሩን ትልቅ ሸክም እንወጣዋለን ብለው የተቀበሉት መሪዎች ቁልቁል ሊያዩት ከሚፈልጉት ሠራተኛ የአጎንባሽነት መንፈስ ሲያጡና ጠያቂነት ሲኖር ለማባረር ህግ የማይቀድማቸው መሆኑ ሌላው ገበናቸው ነው ።
ይህ በነዚህ ሁለት ድርጅቶች ውስጥ ተደላድሎ የሰነበተ ተቋማዊ ችግር ነው በኦሎምፒክ የተገለጠው ። ወትሮም እንዲህ ባለ መልኩ የኖሩና ለተጠያቂነት ያልተፈጠሩ የሚመስሉ ድርጅቶችን ሲመሩ የነበሩ ሰዎችም ናቸው ብሔራዊ ጉዳያችንን የግላቸው ያደረጉት ። በእኛ በኩል ነገሩን በጥልቀት ከፈተሽነው ግን ተጠያቂነቱ ከግለሰቦች አልፎ ወደ መንግስት ወይም ሀገሪቱን ወደሚመራው ፓርቲ በማምራት ብሔራዊ መልክ ሊይዝ እንደሚችል ይሰማናል ።
በተለያየ መንገድ እንደተረዳነው የሁለቱ ድርጅቶች የበላይ መሪዎች እና ወደ ኦሎምፒክ ከሄዱት ውስጥ አብዛኞቹ የፓርቲ አባላት ናቸው ። ከ “ የተከበሩ እነ አቶ እከሌ “ ጀምሮ በኢህአዴግ ውስጥ ከፍተኛ የአመራርነት ቦታ የያዙና በፓርቲው ውስጥ በአባልነት በየእርከኑ ያሉትንም ሰዎች አሉበት ።
እንግዲህ እኛም ከዚህ በመነሳት ነው ሁለቱ ድርጅቶች የምር የማናቸው ስንል የምንጠይቀው ። ሰዎቹ ህዝብን ወክለው እየሰሩ ናቸው እንዳንል ሀላፊነታቸውን በታማኝነት አልተወጡም ። ኢህአዴግ ገዢ ፓርቲ እንደመሆኑ እንደመንግስትነቱ ድርጅቱን ወክለው እየተጓዙ ናቸው ቢባል አንኳን ፓርቲውን የሚያስወቅስ እንጂ የሚያስመሰግን ስራ አልሰሩለትም ። እንዲህም ሆኖ ፓርቲው በህዝብ ወኪልነቱ ፖለቲካዊ እርምጃ መውሰድ ሲገባው በተቃራኒው ሸልሞአቸዋል ።
ሌላ የተለየ አካልም በዚህኛው ኦሎምፒክ ብቻ ሳይሆን ከዚህ ቀደምም ቢሆን ግለሰባዊ ፍላጎታቸውን በድርጅቶቹ እና በህዝብ ስም ሲመነዝሩ ነገሩን በቅርብ ሆኖ ተዉ ሲላቸው አልተገኘም ። እንደዚያ ባይሆን ኖሮ በየአራት አመቱ እየጠበቅን ከነዚሁ ሰዎች ጋር መላልሰን ሙግት ውስጥ መውደቅ አልነበረብንም ። እነርሱም የማትነጥፍ ላም የሆነባቸውን የስልጣን ወንበራቸውን አይለቁ ፣ እኛም መጮኻችንን አንተው ለዓመታት አብረን አለን ።
ዛሬም ኦሎምፒክ ኮሚቴው የማን ነው ? አትሌቲክስ ፌደሬሽንስ ? ብለን እንጠይቃለን ።
እነዚህ ድርጅቶች የውስጥ አስተዳደራቸው ሲፈተሽ ምን ይመስላል ? የሰጠናቸውን ሀላፊነት የመወጣት ፍላጎትና አቅም አላቸው ወይ ? የሚመሯቸው ግለሰቦች እነማን ናቸው ? (መቼም ስማቸውን እንዳልሆን ይገባችኋል ) ምን ያህል ሀላፊነት የሚሰማቸውና ብቃት ያላቸው ናቸው ?
በኢትዮጵያ ቴሌቭዥን እንደተከታተልነው ብዙ ሚሊዮን ብር ከህዝብ ሰብስበዋል ፣ ይህን ገንዘብ እንዴት ነው የሚጠቀሙበት ? ገንዘቡ የት ነው ያለው ? ማነው የሚቆጣጠረው ? ሌላ የሀብት ምንጭ ካላቸው የእስካሁን የአስተዳደር ታሪካቸው ምን ይመስላል ? መንግስት ከዚህ ቀደም በህዝብ የቀረቡ ቅሬታዎችን መሠረት አድርጎ ለምን እርምጃ ሳይወስድ ቀረ ? አትሌቶቻችን የሚያቀርቧቸው ቅሬታዎችና ጥያቄዎች ለምን መልስ አልተሰጠባቸውም ? እነዚህ ሰዎች ለረጅም ዓመታት ህዝብን ባልጠቀመ አስተዳደር ላይ የሙጥኝ ብለው መቀመጣቸው ምክንያቱና ተገቢነቱ ምንድነው ? መተካካት ስፖርቱ ላይ አይሰራም ? ከዚህስ በኋላ ልናምናቸው እንችላለን ?
እነዚህንና መሰል ጉዳዮችን አስመልክቶ በመንግስት ደረጃ መወሰድ የሚገባው እርምጃ በጠቅላይ ሚኒስትር መለስ ዜናዊ ሞት ተዳፍኖ እንዳይቀር እያልን አቶ ሀይለማሪያምም ሆኑ ሌሎች የመንግስት አካላትም እርምጃን በተግባር ፈፅመው እንዲቀናቸው እንመኛለን ።